K. Ee Mungu, uje kutusaidia.
W. Ee Bwana, utusaidie hima.
Atukuzwe Baba na Mwana na Roho Mtakatifu, kama mwanzo, na sasa, na siku zote, na milele. Amina. Aleluya.

UTENZI
E Bwana Mbarikiwa,
Mungu Muumbaji wetu,
Vitu vyote hutakaswa
Katika Wewe, E Mungu,
Wewe waviimarisha
Hata milele vidumu.

Wenye heri, e mkono
Mtakatifu wa Mungu,
Ndiwe watakatifuza
Vitu vyote, vyote vitu,
Na upya unavitia
Wavipamba vyasitawi.

Ewe fahari tukufu,
Enzi yake Bwana Mungu,
Ndani mwako wachukua
Vyote unavyovijaza;
Na yote yanafanyika
Kadiri unavyotaka.

Usifiwe, utukuzwe
Utatu Mtakatifu,
Ujuaye kwa hakika
Na makini zako njia;
Wewe ndiwe nuru kuu
Milele inayodumu.

Kabla ya Adhuhuri
Ant.: Yosefu na Maria, mama ya Yesu, walistaajabia yaliyokuwa yanasemwa juu yake.

Adhuhuri
Ant.: Maria aliyaweka hayo yote, akayatafakari moyoni mwake.

Baada ya Adhuhuri
Ant.: Macho yangu yameuona wokovu ulioandaa machoni pa watu wote.

Zab.119:1-8 Sheria ya Mungu
Kumpenda Mungu ni kuzitii amri zake(1Yoh.5:3)

Heri watu wanaoishi bila kosa,*
wanaozingatia sheria ya Mungu.

Heri wanaofuata amri zake,*
wanaomtii kwa moyo wote,

ambao hawatendi uovu kamwe;*
bali daima huzingatia mwongozo wake.

Ee Mungu, umetupatia sheria zako*
ili tuzishike kiaminifu.

Laiti mwenendo wangu uimarike,*
kwa kuzishika kanuni zako!

Nikizingatia maagizo yako yote,*
hapo kweli sitaaibishwa.

Nitakusifu kwa moyo mnyofu,*
nikijifunza hukumu zako adilifu.

Nitazishika sheria zako;*
usiniache hata kidogo.

Atukuzwe Baba na Mwana*
na Roho Mtakatifu.

Kama mwanzo na sasa na siku zote*
na milele. Amina

Zab.13 Kuomba msaada
Basi, Mungu aliye msingi wa matumaini, awajazeni furaha yote (Rom.15:13)

Ee Mungu, utanisahau kabisa mpaka lini?*
Utajificha mbali nami mpaka lini?

Mpaka lini nitakuwa na huzuni rohoni mwangu,/
na sikitiko moyoni siku hata siku?*
Mpaka lini adui zangu watafurahia taabu yangu?

Ee Mungu, Mungu wangu;*
uniangalie na kunijibu.

Uniangazie macho yangu,*
nisipatwe na usingizi wa kifo.

Usikubali adui zangu waseme: "Tumemweza huyu!“*
Usiwaache hao wafurahie kuanguka kwangu.

Lakini mimi nautumainia upendo wako mkuu;*
moyo wangu na ufurahie wokovu utokao kwako.

Nitakuimbia wewe, Ee Mungu,*
kwa sababu umenijalia mema.

Atukuzwe Baba na Mwana*
na Roho Mtakatifu.

Kama mwanzo na sasa na siku zote*
na milele. Amina

Zab.14. Uovu wa watu
Pale dhambi ilipoongezeka, neema iliongezeka zaidi (Rom.5:20)

Wapumbavu hujisemea: “Hakuna Mungu."/
Wote ni wafisadi, wametenda mambo ya kuchukiza;*
hakuna atendaye chochote kilicho chema!

Toka mbinguni Mungu awachungulia wanadamu,/
aone kama kuna yeyote mwenye busara,*
kama kuna mtu anayemcha Mungu.

Wote kwa pamoja wamepotoka, wote wameharibika;*
hakuna atendaye mema, hakuna hata mmoja.

Mungu asema:*
"Je, wote watendao maovu hawana akili?

Huwakandamiza watu wangu ovyo,/
kama vile watu walavyo mkate;*
wala hawaniombi msaada."

Hapo watatetemeka kwa hofu,*
kwani Mungu awaunga mkono watu waadilifu.

Waovu hupotosha mipango ya mtu mnyonge,*
lakini Mungu ndiye kimbilio lake.

Laiti wokovu umfikie Israeli kutoka Sion!*
Mungu atakaporekebisha hali ya watu wake,

watu wa Yakobo watashangilia,*
naam, watu wa Israeli watafurahi.

Atukuzwe Baba na Mwana*
na Roho Mtakatifu.

Kama mwanzo na sasa na siku zote*
na milele. Amina

Kabla ya Adhuhuri
Ant.: Yosefu na Maria, mama ya Yesu, walistaajabia yaliyokuwa yanasemwa juu yake.

Adhuhuri
Ant.: Maria aliyaweka hayo yote, akayatafakari moyoni mwake.

Baada ya Adhuhuri
Ant.: Macho yangu yameuona wokovu ulioandaa machoni pa watu wote.

MASOMO
Kabla ya Adhuhuri: Omb.1:16
Mimi ninayalilia mambo hayo; Jicho langu, jicho langu linachuruzika maji; Kwa kuwa mfariji yu mbali nami, Ambaye ilimpasa kunihuisha nafsi; Watoto wangu wameachwa peke yao, Kwa sababu huyo adui ameshinda.

K. Bwana aliwapa joho la furaha.
W. Aliweka taji ya utukufu juu ya vichwa vyao.

Sala: tazama chini kabisa ukurasa huu

---
Adhuhuri: Omb.2:11
Macho yangu yamechoka kwa machozi, Mtima wangu umetaabika; Ini langu linamiminwa juu ya nchi Kwa uharibifu wa binti ya watu wangu; Kwa sababu watoto wachanga na wanyonyao, Huzimia katika mitaa ya mji.

K. Watakatifu wataishi milele.
W. Bwana mwenyewe ni tuzo lao.

Sala: tazama chini kabisa ukurasa huu

---
Baada ya Adhuhuri: Yer.31:16,17a
Bwana asema hivi: Zuia sauti yako, usilie, na macho yako yasitoke machozi; Maana kazi yako itapata thawabu, nao watakuja tena toka nchi ya adui; Ndivyo asemavyo BWANA. Tena liko tumaini kwa siku zako za mwisho, asema BWANA.

K. Watakatifu wafurahie utukufu wao.
W. Na washangilie kwa furaha, na kupumzika.

SALA:
Tuombe: Bwana Mungu, watoto wale Watakatifu walikushuhudia, si kwa kusema, bali kwa kufa: ujalie imani tunayoitangaza kwa maneno, idhihirishwe kwa matendo. Tunaomba hayo kwa njia ya Kristo Bwana wetu.

W. Amina.

K. Tumtukuze Bwana.
(W.) tumshukuru Mungu.