ANTIFONA YA KUINGIA: Flp.4:4-5
Furahini katika Bwana sikuzote; tena nasema furahini. Bwana yu karibu.

KOLEKTA
Ee Mungu, unatuona sisi taifa lako tukiingojea Kiaminifu sherehe ya kuzaliwa kwake Bwana wetu. Tunakuomba utujalie tuweze kuzifikia furaha za wokovu huo mkubwa sana, na kuziadhimisha daima kwa ibada kuu na shangwe. Kwa njia ya Bwana wetu Yesu Kristo Mwanao, anayeishi na kutawala nawe katika umoja wa Roho Mtakatifu, Mungu, milele na milele.

SOMO 1: Sef.3:14-18
Imba, Ee binti Sayuni; piga kelele, Ee Israeli; Furahi na kushangilia kwa moyo wako wote, Ee binti Yerusalemu. Bwana ameziondoa hukumu zako, Amemtupa nje adui yako; Mfalme wa Israeli, naam, yeye Bwana, yu katikati yako; hutaogopa uovu tena. Katika siku ile Yerusalemu utaambiwa, Usiogope, Ee Sayuni; mikono yako isilegee. Bwana, Mungu wako, yu katikati yako, Shujaa awezaye kuokoa; Atakushangilia kwa furaha kuu, Atatulia katika upendo wake. Atakufurahia kwa kuimba. Nitawakusanya wanaousikitikia mkutano wa ibada, hao waliokuwa wa kwako.

WIMBO WA KATIKATI: Isa.12:2-6(K)6
1. Tazama, Mungu ndiye wokovu wangu;
Nitatumaini wala sitaogopa;
Maana Bwana ni nguvu zangu na wimbo wangu.
Naye amekuwa wokovu wangu.
Basi, kwa furaha mtateka maji
Katika visima vya wokovu.

（K) Paza sauti, piga kelele Maana Mtakatifu wa Israeli ni mkuu kati yako.

2. Mshukuruni Bwana, liiteni jina lake;
Yatangazeni matendo yake kati ya mataifa
Litajeni jina lake kuwa limetukuka. (K)

3. Mwimbieni Bwana, kwa kuwa ametenda makuu;
Na yajulikane haya katika dunia yote.
Paza sauti, piga kelele, mwenyeji wa Sayuni;
Maana Mtakatifu wa Israeli ni mkuu kati yako. (K)

SOMO 2: Flp.4:4-7
Ndugu zangu: Furahini katika Bwana siku zote; tena nasema, Furahini. Upole wenu na ujulikane na watu wote. Bwana yu karibu. Msijisumbue kwa neno lolote; bali katika kila neno kwa kusali na kuomba, pamoja na kushukuru, haja zenu na zijulikane na Mungu. Na amani ya Mungu, ipitayo akili zote, itawahifadhi mioyo yenu na nia zenu katika Kristo Yesu.

SHANGILIO: Lk.4:18
Aleluya, aleluya!
Roho wa Bwana yu juu yangu, Amenituma kuwahubiri maskini habari njema;
Aleluya!

SOMO 3: INJILI: Lk.3:10-18
Siku ile: Makutano wakamwuliza Yohane Mbatizaji, Tufanye nini basi? Akawajibu akawaambia, Mwenye kanzu mbili na ampe asiye na kanzu; na mwenye vyakula na afanye vivyo hivyo. Watoza ushuru nao wakaja kubatizwa, wakamwuliza, Mwalimu, tufanye nini sisi? Akawaambia, Msitoze kitu zaidi kuliko mlivyoamriwa. Askari onao wakamwuliza, wakisema, Sisi nasi tufanye nini? Akawaambia, Msidhulumu mtu, wala msishitaki kwa uongo; tena mtoshewe na mshahara wenu. Basi, watu walipokuwa wakingoja yatakayotokea, wote wakiwaza-waza mioyoni mwao habari za Yohane, kama labda yeye ndiye Kristo, Yohane alijibu akawaambia wote, Kweli mimi nawabatiza kwa maji; lakini anakuja mtu mwenye nguvu kuliko mimi, ambaye mimi sistahili kuilegeza gidamu ya viatu vyake; yeye atawabatiza kwa Roho Mtakatifu na kwa moto; ambaye pepeo lake li mkononi mwake, naye atausafisha sana uwanda wake, na kuikusanya ngano ghalani mwake, bali makapi atayateketeza kwa moto usiozimika. Basi, kwa maonyo mengine mengi aliwahubiri watu.

Nasadiki husemwa.

MAOMBI
Ndugu katika Kristo, kwa imani na matumaini tumwombe sasa Mungu msaada wake Tukiitikia. "Bwana utuhurumie - Bwana utuhurumie".

1. Kwa ajili ya Kanisa: Ee Baba Mungu Mwenyezi tunakuomba, ulikamilishe Kanisa lako na kulifanya ishara wazi kwa watu wote.

2. Kwa ajili ya ulimwengu: Ee Mungu Mwenyezi, utengeneze upya ulimwengu huu kwa kuupatia haki na amani ili Mwanao apate mahali pazuri pa kufikia.

3. Kwa ajili ya watu wote wasio na matumaini: Tunakuomba Ee Baba Mwenyezi, uwaangaze wale wote wasio na imani bado ili wapate kumtambua Mwanao na kumsadiki kama Mkombozi wao.

4. Kwa ajili yetu sisi tuliokusanyika hapa: Ee Mungu Mwenyezi tunakuomba, ututakase sisi tuliopo hapa, uimarishe imani yetu ili tungojee kwa matumaini makubwa ujio wa pili wa Mkombozi wetu Yesu Kristo.

5. Kwa ajili ya watu wote: uwasadikishe watu wote wakusadiki na kuamini kuwa bila Yesu Kristo hakuna Wokovu.

6. Kwa ajili ya marehemu wote: Ee Baba Mungu Mwenyezi, wahurumie na kuwatakasa marehemu wetu wote na kuwapa raha ya milele.

Ee Mungu Baba yetu, unayetia nguvu ndani ya mioyo iliyolegea, upokee kwa huruma maombi yetu tuwe imara daima, kwa jina la Kristo Bwana wetu. Amina.

SALA YA KUOMBEA DHABIHU
Ee Bwana, tunakuomba sadaka ya ibada yetu itolewe kwako daima. Nayo itimize agizo la kuadhimisha fumbo takatifu, na kutenda kwa mafanikio wokovu wako ndani yetu. Kwa njia ya Kristo Bwana wetu.

1. UTANGULIZI WA MAJILIO:
MAJILIO I:
K. Bwana awe nanyi.
W. Na awe rohoni mwako.
K. Inueni mioyo.
W. Tumeiinua kwa Bwana.
K. Tumshukuru Bwana Mungu wetu.
W. Ni vema na haki.

K. Kweli ni vema na haki, tendo la kufaa na la kuleta wokovu, tukushukuru Wewe daima na popote, ee Bwana, Baba uliye mtakatifu, Mungu mwenyezi wa milele, kwa njia ya Kristo Bwana wetu.
Yeye, katika ujio wake wa kwanza, alipokuja katika unyenyekevu wa mwili, aliutimiza mpango ulioandaliwa nawe tangu kale. Hivyo, akatufungulia njia ya wokovu wa milele, ili, atakapokuja tena katika utukufu wa enzi yake, hatimaye tupewe waziwazi mema yaliyoahidiwa, ambayo kwa sasa tunathubutu kuyatarajia, tukikesha.
Kwa sababu hiyo, sisi pamoja na Malaika na Malaika Wakuu, pamoja na Viti vya enzi na Milki, na majeshi yote ya Malaika wa mbinguni, twaimba utenzi wa utukufu wako, tukisema bila mwisho:

W. Mtakatifu, Mtakatifu, Mtakatifu,
Bwana Mungu wa majeshi.
Mbingu na dunia zimejaa utukufu wako.
Hosana juu mbinguni.
Mbarikiwa ajaye kwa jina la Bwana.
Hosana juu mbinguni.

ANTIFONA YA KOMUNYO: Isa.35:4
Waambieni walio na moyo wa hofu, Jipeni moyo, msiogope; tazama, Mungu wetu atakuja na kutuokoa.

SALA BAADA YA KOMUNYO
Ee Bwana, tunakuomba utujalie huruma yako, ili misaada hii ya kimungu ituondolee dhambi zetu, na kutuweka tayari kwa sikukuu zijazo. Kwa njia ya Kristo Bwana wetu.