ANTIFONA YA KUINGIA: Zab.95:6-7
Njoni, tumwabudu Mungu, tusujudu, tupige magoti mbele za Bwana aliyetuumba; kwa maana ndiye Bwana Mungu wetu.

UTUKUFU husemwa.

KOLEKTA:
Ee Bwana, tunakuomba, uilinde familia yako kwa wema wako usio na mwisho, ili, hao wanaotegemea tumaini la neema ya mbinguni tu, waimarishwe daima na ulinzi wako. Kwa njia ya Bwana wetu Yesu Kristo Mwanao, anayeishi na kutawala nawe katika umoja wa Roho Mtakatifu, Mungu, milele na milele.

SOMO 1: Isa.6:1-2a,3-8
Katika mwaka ule aliokufa mfalme Uzia nalimwona Bwana ameketi katika kiti cha enzi, kilicho juu sana na kuinuliwa sana, na pindo za vazi lake zikalijaza hekalu. Juu yake walisimama maserafi; kila mmoja alikuwa na mabawa sita. Wakaitana, kila mmoja na mwenzake, wakisema, Mtakatifu, Mtakatifu, Mtakatifu, ni Bwana wa majeshi; dunia yote imejaa utukufu wake. Na misingi ya vizingiti ikatikisika kwa sababu ya sauti yake aliyelia, nayo nyumba ikajaa moshi. Ndipo niliposema, Ole wangu! Kwa maana nimepotea; kwa sababu mimi ni mtu mwenye midomo michafu, nami ninakaa kati ya watu wenye midomo michafu; na macho yangu yamemwona Mfalme, Bwana wa majeshi. Kisha mmoja wa maserafi wale akaruka akanikaribia; naye alikuwa na kaa la moto mkononi mwake, ambalo alikuwa amelitwaa kwa makoleo toka juu ya madhabahu; akanigusa kinywa changu kwa kaa hilo, akaniambia, Tazama, hili limekugusa midomo yako, na uovu wako umeondolewa, na dhambi yako, imefunikwa. Kisha nikaisikia sauti ya Bwana, akisema, Nimtume nani, naye ninani atakayekwenda kwa ajili yetu? Ndipo niliposema, Mimi hapa, nitume mimi.

WIMBO WA KATIKATI: Zab.138:1-5,7-8,(K)1
1. Nitakushukuru kwa moyo wangu wote,
Mbele ya miungu nitakuimbia zaburi.
Nitasujudu nikilikabili hekalu lako takatifu,
Nitalishukuru jina lako.

(K) Ee Bwana, Mbele ya miungu nitakuimbia zaburi.

2. Nitalishukuru jina lako,
Kwa ajili ya fadhili zako na uaminifu wako,
Kwa maana umeikuza ahadi yako,
Kuliko jina lako lote.
Siku ile niliyokuita uliniitikia,
Ukanifariji nafsi kwa kunitia nguvu. (K)

3. Ee Bwana, wafalme wote wa dunia watakushukuru,
Watakapoyasikia maneno ya kinywa chako.
Naam, wataziimba njia za Bwana,
Kwa maana utukufu wa Bwana ni mkuu. (K)

4. Utanyosha mkono juu ya hasira ya adui zangu,
Na mkono wako wa kuume utaniokoa.
Bwana atanitimilizia mambo yangu;
Ee Bwana, fadhili zako ni za milele;
Usiziache kazi za mikono yako. (K)

SOMO 2: 1Kor.15:1-11
Ndugu zangu, nawaarifu ile Injili niliyowahubiri; ambayo ndiyo mliyoipokea, na katika hiyo mnasimama, na kwa hiyo mnaokolewa; ikiwa mnayashika sana maneno niliyowahubiri; isipokuwa mliamini bure. Kwa maana naliwatolea ninyi hapo mwanzo yale niliyoyapokea mimi mwenyewe, ya kuwa Kristo alikufa kwa ajili ya dhambi zetu, kama yanenavyo Maandiko; na ya kuwa alizikwa; na ya kuwa alifufuka siku ya tatu, kama yanenavyo maandiko; na ya kuwa alimtokea Kefa; tena na wale Thenashara; baadaye aliwatokea ndugu zaidi ya mia tano pamoja; katika hao wengi wanaishi hata sasa, ila baadhi yao wamelala; baadaye akamtokea Yakobo; tena na mitume wote; na mwisho wa watu wote, alinitokea mimi, kama ni mtu aliyezaliwa si kwa wakati wake. Maana mimi ni mdogo katika Mitume, nisiyestahili kuitwa mtume, kwa sababu naliliudhi Kanisa la Mungu. Lakini kwa neema ya Mungu nimekuwa hivi nilivyo; na neema yake iliyo kwangu ilikuwa si bure, bali nalizidi sana kufanya kazi kupita wao wote; wala si mimi, bali ni neema ya Mungu pamoja nami. Basi, kama ni mimi, kama ni wale, ndivyo tuhubirivyo, na ndivyo mlivyoamini.

SHANGILIO: Yn.8:12
Aleluya, aleluya!
Mimi ndimi nuru ya ulimwengu, asema Bwana,
Yeye anifuataye atakuwa na nuru ya uzima.
Aleluya!

INJILI: Lk.5:1-11
Ikawa makutano walipomsonga wakilisikiliza neno la Mungu, Yesu alikuwa amesimama kando ya ziwa la Genesareti, akaona vyombo viwili vimekaa kando ya ziwa, lakini wavuvi wametoka, wanaosha nyavu zao. Akaingia katika chombo kimoja, ndicho chake Simoni, akamtaka akipeleke mbali kidogo na pwani. Akaketi, akawafundisha makutano ali chomboni. Hata alipokwisha kunena, alimwambia Simoni, Tweka mpaka kilindini, mkashushe nyavu zenu mvue samaki. Simoni akajibu akamwambia, Bwana mkubwa, tumefanya kazi ya kuchosha usiku kucha, tusipate kitu; lakini kwa neno lako nitazishusha nyavu. Basi, walipofanya hivyo walipata samaki wengi mno, nyavu zao zikaanza kukatika; wakawapungia mikono washirika wao waliokuwa katika chombo cha pili, waje kuwasaidia; wakaja, wakavijaza vyombo vyote viwili, hata vikataka kuzama. Simoni Petro alipoona hayo, alianguka magotini pa Yesu, akisema, Ondoka kwangu, kwa kuwa mimi ni mtu mwenye dhambi, Bwana. Maana alishikwa na ushangao, yeye na wote waliokuwa pamoja naye, kwa sababu ya wingi wa samaki walioupata; na kadhalika Yakobo na Yohane, wana wa Zebedayo, waliokuwa washirika wa Simoni. Yesu akamwambia Simoni, Usiogope, tangu sasa utakuwa ukivua watu. Hata walipokwisha kuviegesha pwani vyombo vyao, wakaacha vyote wakamfuata.

Nasadiki husemwa.

MAOMBI
Bwana Yesu hakuwa mvuvi, kwa hiyo Petro alithubutu kumkumbusha Yesu kwamba ni kazi bure kuvua samaki mchana. Hata hivyo alimtii Yesu akashusha nyavu tena baharini. Ee Mungu Baba, Yesu alitaka kututia moyo wa kumtegemea kabisa hata katika matatizo makubwa. Yeye yupo katika chombo chetu kinachoyumbishwa na mawimbi ya maisha. Tunakuomba,

1. Utukumbushe kwamba Yesu, msaada wetu, yupo karibu nasi, naye yu tayari kabisa kutusaidia tukimwendea hasa tunapopatwa na matatizo.

2. Utuongezee matumaini tusikate tamaa katika hali yoyote, bali tumkimbilie Yesu katika mahangaiko yetu.

3. Uwaimarishe wasaidizi katika kazi za uchungaji kutokufa moyo wanapokabiliwa na matatizo katika kazi zao.

4. Uwaongoze na kuwasaidia mapadre, mashemasi na wote wanaotoa huduma za kiroho katika kazi zao.

5. Uwaamshe vijana wengi kujiunga na kazi katika Kanisa lako.

6. Uwape tuzo ya uzima wa milele marehemu wote waliojitoa katika utumishi wa Kanisa.

Ee Baba wa huruma, mitume walifanikiwa katika kazi zao kwa nguvu ya Yesu. Utukirimie kwa kutusikiliza maombi yetu kwa njia ya Kristu, Bwana wetu. Amina.

SALA YA KUOMBEA DHABIHU:
Ee Bwana Mungu wetu, umeumba vitu hivi ili vitusaidie hasa katika udhaifu wetu. Tunakuomba utujalie viwe pia sakramenti ya kutuletea uzima wa milele. Kwa njia ya Kristo Bwana wetu.

ANTIFONA YA KOMUNYO: Yn.1:12
Na wamshukuru Bwana kwa fadhili zake, na maajabu yake kwa wanadamu; maana hushibisha nafsi yenye shauku, na nafsi yenye njaa huijaza mema.

AU: Mt.5:4,6
Heri wenye huzuni; maana hao watafarijika. Heri wenye njaa na kiu ya haki; maana hao watashibishwa.

SALA BAADA YA KOMUNYO:
Ee Mungu, umependa tushiriki mkate mmoja na kikombe kimoja. Tunakuomba utujalie kuishi tumeungana na Kristo, tupate kuzaa matunda kwa furaha, kwa manufaa ya wokovu wa ulimwengu. Kwa njia ya Kristo Bwana wetu.