ANTIFONA YA KUINGIA: Zab.13:6
Nami nimezitumainia fadhili zako; moyo wangu na uufurahie wokovu wako. Naam, nimwimbie Bwana, kwa kuwa amenitendea kwa ukarimu.

UTUKUFU husemwa.

KOLEKTA:
Ee Mungu mwenyezi, tunakuomba utujalie tutafakari daima yaliyo mema, ili tutimize kwa maneno na matendo yale yanayokupendeza. Kwa njia ya Bwana wetu Yesu Kristo Mwanao, anayeishi na kutawala nawe katika umoja wa Roho Mtakatifu, Mungu, milele na milele.

SOMO 1: 1Sam.26:2,7-9,12-13,22-23
Sauli aliondoka, akashuka nyikani kwa Zifu, naye alikuwa na watu elfu tatu, wateule wa Israeli, pamoja naye, ili kumtafuta Daudi katika nyika ya Zifu. Basi Daudi na Abishai wakawaendea watu usiku; na tazama, Sauli alikuwepo kati ya magari amelala usingizi, na fumo lake limechomekwa chini, karibu na kichwa chake; naye Abneri na watu wake wamelala wakimzunguka. Ndipo Abishai akamwambia Daudi, Mungu amemtia adui yako mikononi mwako leo; basi, niache nimpige kwa hilo fumo hata nchi kwa pigo moja, sitampiga mara ya pili. Lakini Daudi akamwambia Abishai, “Usimwangamize; kwani ni nani awezaye kuunyosha mkono wake juu ya masiya wa Bwana, naye akawa hana hatia?" Basi Daudi akalitwaa lile fumo, na lile gudulia la maji kichwani pa Sauli; nao wakaenda zao, wala hapana mtu aliyeliona jambo hili, wala kulijua, wala kuamka; maana wote walikuwa wamelala; kwa kuwa usingizi mzito kutoka kwa Bwana umewaangukia. Kisha Daudi akaenda ng'ambo ya pili, akasimama juu ya kilima mbali sana; palikuwapo nafasi tele katikati yao. Daudi akajibu, akasema, “Litazame fumo hili, ee mfalme! Kijana mmoja na avukie huku, alitwae. Naye Bwana atamlipa kila mtu haki yake, na uaminifu wake; maana Bwana amekutia mikononi mwangu leo, nami nalikataa kuunyosha mkono wangu juu ya masiya wa Bwana.”

WIMBO WA KATIKATI: Zab.103:1-4,8,10,12-13 (K)8
1. Ee nafsi yangu, umhimidi Bwana;
Naam, vyote vilivyo ndani yangu
Vilihimidi jina lake takatifu.
Ee nafsi yangu umhimidi Bwana,
Wala usizisahau fadhili zake zote.

（K) Bwana amejaa huruma na neema.

2. Akusamehe maovu yako yote,
Akuponya magonjwa yako yote,
Aukomboa uhai wako na kaburi,
Akutia taji ya fadhili na rehema, (K)

3. Bwana amejaa huruma na neema,
Haoni hasira upesi, ni mwingi wa fadhili.
Hakututenda sawasawa na hatia zetu,
Wala hakutulipa kwa kadiri ya maovu yetu. (K)

4. Kama mashariki ilivyo mbali na magharibi,
Ndivyo alivyoweka dhambi zetu mbali nasi.
Kama vile baba awahurumiavyo watoto wake,
Ndivyo Bwana anavyowahurumia wamchao. (K)

SOMO 2: 1Kor.15:45-49
Ndugu zangu, ndivyo ilivyoandikwa: Mtu [wa kwanza, Adamu,] akawa nafsi iliyo hai. Adamu wa mwisho ni roho yenye kuhuisha. Lakini hautangulii ule wa roho, bali ule wa asili; baadaye huja ule wa roho. Mtu wa kwanza atoka katika nchi, ni wa udongo. Mtu wa pili atoka mbinguni. Kama alivyo yeye wa udongo, ndivyo walivyo walio wa udongo; na kama alivyo yeye wa mbinguni, ndivyo walivyo walio wa mbinguni. Na kama tulivyoichukua sura yake yule wa udongo, kadhalika tutaichukua sura yake yeye aliye wa mbinguni.

SHANGILIO: Yn.13:34
Aleluya, aleluya!
Nawapa amri mpya, mpendane.
Kama vile nilivyowapenda ninyi,
Nanyi mpendane vivyo hivyo.
Aleluya!

INJILI: Lk.6:27-38
Siku ile Yesu aliwaambia wafuasi wake: Nawaambia ninyi mnaosikia, Wapendeni adui zenu, watendeeni mema wale ambao wawachukia ninyi, wabarikieni wale ambao wawalaani ninyi, waombeeni wale ambao wawaonea ninyi. Akupigaye shavu moja, mgeuzie la pili, naye akunyang'anyaye joho lako, usimzuilie na kanzu. Mpe kila akuombaye, na akunyang'anyaye vitu vyako, usitake akurudishie. Na kama mnavyotaka watu wawatendee ninyi, watendeeni vivyo hivyo. Maana mkiwapenda wale wawapendao ninyi, mwaonesha fadhili gani? Kwa kuwa hata wenye dhambi huwapenda wale wawapendao. Nanyi mkiwatendea mema wale wawatendeao mema, mwaonesha fadhili gani? Hata wenye dhambi hufanya vivyo hivyo. Na mkiwakopesha watu huku mkitumaini kupata kitu kwao, mwaonesha fadhili gani? Hata wenye dhambi huwakopesha wenye dhambi, ili warudishiwe vilevile. Bali wapendeni adui zenu, tendeni mema, na kukopesha msitumaini kupata malipo, na thawabu yenu itakuwa nyingi; nanyi mtakuwa wana wa Aliye juu, kwa kuwa yeye ni mwema kwa wasiomshukuru, na waovu. Basi, iweni na huruma, kama Baba yenu alivyo na huruma. Msihukumu, nanyi hamtahukumiwa; msilaumu, nanyi hamtalaumiwa; achilieni, nanyi mtaachiliwa. Wapeni watu vitu, nanyi mtapewa; kipimo cha kujaa na kushindiliwa, na kusukwasukwa hata kumwagika, ndicho watu watakachowapa vifuani mwenu. Kwa kuwa kipimo kilekile mpimacho ndicho mtakachopimiwa.

Nasadiki husemwa.

MAOMBI
Katika Injili ya leo tumesikia kanuni kuu ya maisha yetu: Jinsi mnavyopenda kutendewa na watu, nanyi watendeeni vivyo hivyo.

Ee Mungu Baba,
1. Utufundishe kuacha kulipiza kisasi bali tuishi kwa uelewano na ushirikiano.

2. Utuwezeshe kuwapenda na kuwabariki wale wanaotukosea.

3. Ulainishe mioyo yetu, tutafute njia ya kupatanishwa badala ya kutunza uchungu, chuki na hasira mioyoni mwetu.

4. Utusaidie kutambua kwamba wema na upole hutusaidia kuishi kwa amani.

5. Utuondoshee choyo na kutufanya wakarimu, kwa kuwa umetuahidia kwamba utaturudishia thawabu kwa kipimo chema kilichoshindiliwa.

6. Uwakarimie marehemu wote walioonesha ukarimu kwa wengine.

Ee Mungu Baba, amri yako ni rahisi kutimiza kwa kuwa hatuhitaji silaha wala vyombo ila moyo wa kupenda tu. Uyapokee maombi yetu kwa njia ya Bwana wetu Yesu Kristu aliyetuambia kwamba Wewe, Baba, ni upendo, daima na milele. Amina.

SALA YA KUOMBEA DHABIHU:
Ee Bwana, sisi tunaoadhimisha mafumbo yako ipasavyo, tunakuomba sana, hayo tunayokutolea kwa heshima ya utukufu wako yatufae kwa wokovu. Kwa njia ya Kristo Bwana wetu.

ANTIFONA YA KOMUNYO: Zab.9:1-2
Nitayasimulia matendo yako yote ya ajabu. Nitafurahi na kukushangilia Wewe; nitaliimbia jina lako, Wewe Uliye juu.

Au: Yn.11:27
Bwana, mimi nimesadiki ya kwamba wewe ndiwe Kristo, Mwana wa Mungu, yule ajaye ulimwenguni.

SALA BAADA YA KOMUNYO:
Ee Mungu mwenyezi, tunakuomba utujalie mapato ya wokovu, ambao amana yake tumeipata kwa mafumbo haya. Kwa njia ya Kristo Bwana wetu.