SOMO 1: Ebr.3:7-14
Roho Mtakatifu asema: Leo, kama mtaisikia sauti yake, Msifanye migumu mioyo yenu, Kama wakati wa kukasirisha, Siku ya kujaribiwa katika jangwa, Hapo baba zenu waliponijaribu, wakanipima, Wakaona matendo yangu miaka arobaini. Kwa hiyo nalichukizwa na kizazi hiki, Nikasema, Siku zote ni watu waliopotoka mioyo hawa; Hawakuzijua njia zangu; Kama nilivyoapa kwa hasira yangu, Hawataingia rahani mwangu. Angalieni, ndugu zangu, usiwe katika mmoja wenu moyo mbovu wa kutokuamini, kwa kujitenga na Mungu aliye hai. Lakini mwonyane kila siku, maadamu iitwapo leo; ili mmoja wenu asifanywe mgumu kwa udanganyifu wa dhambi. Kwa maana tumekuwa washirika wa Kristo, kama tukishikamana na mwanzo wa uthabiti wetu kwa nguvu mpaka mwisho;

WIMBO WA KATIKATI: Zab.95:6-11 (K)8
1. Njoni, tuabudu, tusujudu,
Tupige magoti mbele za Bwana aliyetuumba.
Kwa maana ndiye Mungu wetu,
Na sisi tu watu wa malisho yake,
Na kondoo za mkono wake.

（K) Ingekuwa heri leo msikie sauti yake!

2. Msifanye migumu mioyo yenu;
Kama vile huko Meriba Kama siku ya Masa jangwani.
Hapo waliponijaribu baba zenu,
Wakanipima, wakayaona matendo yangu. (K)

3. Miaka arobaini nalihuzunika na kizazi kile,
Nikasema, Hao ni watu waliopotoka mioyo,
Hawakuzijua njia zangu.
Nikaapa kwa hasira yangu Wasiingie rahani mwangu.(K)

SHANGILIO: Mt.11:25
Aleluya, aleluya!
Nakushukuru, Baba, Bwana wa mbingu na nchi, kwa kuwa mambo haya uliwaficha wenye hekima na akili, ukawafunulia watoto wachanga.
Aleluya!

INJILI: Mk.1:40-45
Siku ile mtu mwenye ukoma alikuja kwa Yesu, akamsihi na kumpigia magoti, na kumwambia, Ukitaka, waweza kunitakasa. Naye akamhurumia, akanyosha mkono wake, akamgusa, akamwambia, Nataka, takasika. Na mara ukoma wake ukamtoka, akatakasika. Akamkataza kwa nguvu, akamwondoa mara, akamwambia, Angalia, usimwambie mtu neno lolote, ila enenda zako ukajioneshe kwa kuhani, ukatoe alivyoamuru Musa kwa kutakasika kwako, iwe ushuhuda kwao. Lakini akatoka, akaanza kuhubiri maneno mengi, na kulitangaza lile neno, hata Yesu asiweze tena kuingia mjini kwa wazi; bali alikuwako nje mahali pasipokuwa na watu, wakamwendea kutoka kila mahali.

--------------
Maombi mengine
--------------
MAOMBI
Ndugu zangu, tunahitaji msaada wa Mungu aliye hai tupate kutimiza mapenzi yake kwa moyo mnyofu na imani thabiti. Kwa hiyo tuombe neema yake.

Kiitikio: Twakuomba utusikie.
1. Uwaongezee Baba Mtakatifu, Maaskofu, na wakleri wetu wote neema ya kulitangaza neno lako kwa ufasaha na kuadhimisha Ekaristi Takatifu kwa uchaji. Ee Bwana.

2. Uilainishe mioyo migumu ya watawala wasiopenda kuzijua njia zako. Ee Bwana.

3. Uliepushe Kanisa lako na dhuluma ya aina yoyote; na uliimarishe katika imani, matumaini na mapendo kwako katika taabu na raha. Ee Bwana.

4. Umjalie kila mmoja wetu ujasiri wa kuonyana, wala tusiendekeze ugumu kwa udanganyifu wa dhambi. Ee Bwana.

5. Uwakaribishe ndugu zetu marehemu kwako mbinguni. Ee Bwana.

Ee Mungu, Wewe upo tayari kuwatakasa wote wanaokujia na kuomba huruma yako. Uyapokee maombi yetu hata yale tusiyothubutu kuomba. Kwa njia ya Kristo Bwana wetu. Amina.