SOMO 1: Mwa.11:1–9
Nchi yote ilikuwa na lugha moja na usemi mmoja. Ikawa watu waliposafiri pande za mashariki waliona nchi tambarare katika nchi ya Shinari; wakakaa huko. Wakaambiana, Haya, na tufanye matofali tukayachome moto. Walikuwa na matofali badala ya mawe, na lami badala ya chokaa. Wakasema, Haya, na tujijengee mji, na mnara, na kilele chake kifike mbinguni, tujifanyie jina; ili tusipate kutawanyika usoni pa nchi yote. Bwana akashuka ili auone mji na mnara waliokuwa wakiujenga wanadamu. Bwana akasema, Tazama, watu hawa ni taifa moja, na lugha yao ni moja; na hayo ndiyo wanayoanza kuyafanya, wala sasa hawatazuiliwa neno wanalokusudia kulifanya. Haya, na tushuke huko, tuwachafulie usemi wao ili wasisikilizane maneno wao kwa wao. Basi Bwana akawatawanya kutoka huko waende usoni pa nchi yote; wakaacha kuujenga ule mji. Kwa sababu hiyo jina lake likaitwa Babeli; maana hapo ndipo Bwana alipoichafua lugha ya dunia yote; na kutoka huko Bwana akawatawanya waende usoni pa nchi yote.

WIMBO WA KATIKATI: Zab.33:10–15 (K)12
1. Bwana huyabatilisha mashauri ya mataifa,
Huyatangua makusudi ya watu.
Shauri la Bwana lasimama milele,
Makusudi ya moyo wake vizazi na vizazi.

（K) Heri taifa ambalo Bwana ni Mungu wao.

2. Heri taifa ambalo Bwana ni Mungu wao,
Watu aliowachagua kuwa urithi wake.
Toka mbinguni Bwana huchungulia,
Huwatazama wanadamu wote pia. (K)

3. Toka mahali pake aketipo,
Huwaangalia wote wakaao duniani.
Yeye aiumbaye mioyo yao wote
Huzifikiri kazi zao zote. (K)

SHANGILIO: Zab.119:13
Aleluya, aleluya!
Umwangazie mtumishi wako uso wako,
na kunifundisha amri zako.
Aleluya!

INJILI: Mk.8:34–9:1
Yesu aliwaita mkutano pamoja na wanafunzi wake, akawaambia, Mtu yeyote akitaka kunifuata, na ajikane mwenyewe, ajitwike na msalaba wake, anifuate. Kwa kuwa mtu atakaye kuiponya nafsi yake, ataiangamiza, na mtu atakayeiangamiza nafsi yake kwa ajili yangu na kwa ajili ya Injili, huyu ataisalimisha. Kwa kuwa itamfaidia mtu nini kuupata ulimwengu wote, akipata hasara ya nafsi yake? Ama mtu atoe nini badala ya nafsi yake? Maana kila mtu atakayenionea haya mimi, na maneno yangu, katika kizazi hiki cha uzinzi na dhambi, Mwana wa Adamu atamwonea haya mtu huyo, atakapokuja katika utukufu wa Baba yake pamoja na malaika watakatifu. Akawaambia, Amin, nawaambia, Pana watu katika hawa wasimamao hapa, ambao hawataonja mauti kabisa, hata watakapouona ufalme wa Mungu umekuja kwa nguvu.

--------------
Maombi mengine
--------------
MAOMBI
Ndugu, kumfuata Yesu Kristo maana yake kuwa tayari kuupokea na kuubeba msalaba na hata kuwa tayari kufa kwa ajili yake. Wajibu huu ni wa muhimu sana. Tuombe:-

Kiitikio: Upokee ombi letu.
1. Viongozi wa Kanisa wadumishe lugha moja ya upendo, ili Injili yako ienee duniani kote kwa nguvu ya Roho wako Mtakatifu. Ee Bwana.

2. Wote wenye mamlaka wajaliwe busara na utawala bora, ili mali za ulimwengu huu ziwe kwa faida ya watu wako kimwili na kiroho. Ee Bwana.

3. Utuepushe sisi sote na kiburi chenye mwelekeo wa kukukosoa Wewe na kazi yako ya uumbaji. Ee Bwana.

4. Umjalie kila mmoja wetu kuiishi imani yake kwa matendo, tupate kuhesabiwa haki kama ulivyomfanyia baba yetu Ibrahimu. Ee Bwana.

5. Uwajalie marehemu wetu kuuona ufalme wako ukiwajia kadiri ya huruma na upendo wako. Ee Bwana.

Tunaomba hayo kwa njia ya Mwanao Mpenzi, Yesu Kristo, Bwana wetu. Amina.