SOMO: 1Kor.2:10-16
Roho huchunguza yote, hata mafumbo ya Mungu. Maana ni nani katika binadamu ayajuaye mambo ya binadamu ila roho ya binadamu iliyo ndani yake? Vivyo hivyo na mambo ya Mungu hakuna ayafahamuye ila Roho wa Mungu. Lakini sisi hatukuipokea roho ya dunia, bali Roho atokaye kwa Mungu, makusudi tupate kuyajua tuliyokirimiwa na Mungu. Nayo twayanena, si kwa maneno yanayofundishwa kwa hekima ya kibinadamu, bali yanayofundishwa na Roho, tukiyafasiri mambo ya rohoni kwa maneno ya rohoni. Basi mwanadamu wa tabia ya asili hayapokei mambo ya Roho wa Mungu; maana kwake huyo ni upuzi, wala hawezi kuyafahamu, kwa kuwa yatambulikana kwa jinsi ya rohoni. Lakini mtu wa rohoni kuyatambua yote, wala yeye hatambuliwi na mtu. Maana, ni nani aliyeifahamu nia ya Bwana, amwelimishe? Lakini sisi tunayo nia ya Kristo.

WIMBO WA KATIKATI: Zab.145:8-14(K)17
1. Bwana ana fadhili, ni mwingi wa huruma,
Si mwepesi wa hasira, ni mwingi wa rehema,
Bwana ni mwema kwa watu wote,
Na rehema zake zi juu ya kazi zake zote.

(K) Bwana ni mwenye haki katika njia zake zote.

2. Ee Bwana, kazi zako zote zitakushukuru,
Na wacha Mungu wako watakuhimidi.
Wataunena utukufu wa ufalme wako,
Na kuuhadithia uweza wako.
Ili kuwajulisha watu matendo yake makuu,
Na utukufu wa fahari ya ufalme wake. (K).

3. Ufalme wako ni ufalme wa zamani zote,
Na mamlaka yako ni ya vizazi vyote.
Bwana huwategemeza wote waangukao,
Huwainua wote walioinama chini. (K)

SHANGILIO: Ebr.4:12
Aleluya, aleluya!
Neno la Mungu li hai tena li na nguvu, li jepesi kuyatambua mawazo na makusudi ya moyo.
Aleluya!

INJILI: Lk.4:31-37
Yesu alishuka mpaka Kapernaumu, mji wa Galilaya, akawa akiwafundisha siku ya sabato; wakashangaa mno kwa mafundisho yake, kwa kuwa neno lake lilikuwa na uwezo. Na ndani ya sinagogi mlikuwa na mtu mwenye roho ya pepo mchafu, akalia kwa sauti kuu, akisema, Acha! Tuna nini nawe, Yesu wa Nazareti? Umekuja kutuangamiza? Nakujua u nani, Mtakatifu wa Mungu. Yesu akamkemea, akisema, Fumba kinywa, mtoke. Ndipo yule pepo akamwangusha katikati, akamtoka asimdhuru neno. Mshangao ukawashika wote, wakasemezana wakisema, Ni neno gani hili, maana awaamuru pepo wachafu kwa uwezo na nguvu, nao hutoka. Habari zake zikaenea kila mahali katika nchi ile.

--------------
Maombi mengine
--------------
MAOMBI
Ee Mungu, malaika wanakutumikia daima huko mbinguni. Kwa vile nasi twatamani kufika huko waliko, tunakuomba tukisema:-

Kiitikio: Twakuomba utusikie.
1. Umjalie Askofu wetu F. na wahubiri wote wa neno lako kuwakumbusha watu, kwamba siku yako itakuja ghafla kama mwivi. Ee Bwana.

2. Ubariki juhudi za viongozi wetu wa serikali, ili kazi zao njema zitufae sisi sote. Ee Bwana.

3. Utujalie sisi sote kujiandaa vema kwa ujio wako Bwana siku ya mwisho ili, hata ukija ghafla, utukute tukikesha katika nuru yako. Ee Bwana.

4. Roho wako anayeyachunguza yote, awajalie wanaoutafuta ukweli kutambua kuwa yanayofundishwa na Roho hufasiriwa kwa maneno ya rohoni. Ee Bwana.

5. Uwaponye wagonjwa wetu, uwafukuze pepo wabaya, na uwajalie ndugu zetu marehemu uzima wa milele huko mbinguni. Ee Bwana.

Ee Mungu unayetaka tukeshe na kuwa na kiasi, uipokee sala yetu. Kwa njia ya Kristo Bwana wetu. Amina.