SOMO Efe.5:21-33
Hali mnanyenyekeana katika kicho cha Kristo. Enyi wake, watiini waume zenu kama kumtii Bwana wetu. Kwa maana mume ni kichwa cha mkewe, kama Kristo naye ni kichwa cha Kanisa; naye ni mwokozi wa mwili. Lakini kama vile Kanisa limtiivyo Kristo, vivyo hivyo wake nao wawatii waume zao katika kila jambo. Enyi waume, wapendeni wake zenu, kama Kristo naye alivyolipenda Kanisa, akajitoa kwa ajili yake; ili makusudi alitakase na kulisafisha kwa maji katika neno; apate kujiletea Kanisa tukufu, lisilo na ila wala kunyanzi wala lolote kama hayo; bali liwe takatifu lisilo na mawaa. Vivyo hivyo imewapasa waume nao kuwapenda wake zao kama miili yao wenyewe. Ampendaye mkewe hujipenda wenyewe. Maana hakuna mtu anayeuchukia mwili wake popote; bali huulisha na kuutunza, kama Kristo naye anavyolitendea Kanisa. Kwa kuwa tu viungo vya mwili wake. Kwa sababu hiyo mtu atamwacha baba yake na mama yake, ataambatana na mkewe na hao wawili watakuwa mwili mmoja. Siri hiyo ni kubwa; ila mimi nanena habari ya Kristo na Kanisa. Lakini kila mtu ampende mke wake kama nafsi yake mwenyewe; wala mke asikose kumstahi mumewe.

WIMBO WA KATIKATI: Zab.128:1-5(K)1
1. Heri kila mtu amchaye Bwana,
Aendaye katika njia yake.
Taabu ya mikono yako hakika utaila;
Utakuwa heri, na kwako kwema.

(K) Heri kila mtu amchaye Bwana.

2. Mkeo atakuwa kama mzabibu uzaao,
Vyumbani mwa nyumba yako.
Wanao kama miche ya mizeituni
Wakiizunguka meza yako. (K)

3. Tazama, atabarikiwa hivyo, yule amchaye Bwana.
Bwana akubariki toka Sayuni;
Uone uheri wa Yerusalemu siku zote za maisha yako. (K)

SHANGILIO: 1Pet.1:25
Aleluya, aleluya!
Neno la Bwana hudumu hata milele, na neno hilo ni neno lile jema lililohubiriwa kwenu.
Aleluya!

INJILI: Lk.13:18-21
Yesu alisema, Ufalme wa Mungu umefanana na nini? Nami niufananishe na nini? Umefanana na punje ya haradali aliyotwaa mtu akaitupa katika shamba lake; ikamea, ikawa mti; ndege wa angani wakakaa katika matawi yake. Akasema mara ya pili, Niufananishe na nini ufalme wa Mungu? Umefanana na chachu aliyotwaa mwanamke akaisitiri ndani ya pichi tatu za unga, hata ukachacha wote pia.

--------------
Maombi mengine
--------------
MAOMBI
Wapendwa, tumealikwa kulipokea neno la Mungu liwezalo kuziokoa roho zetu. Kwa kuwa tunahitaji msaada wa Mungu, tuombe neema yake.

Kiitikio: Upokee ombi letu.
1. Ili viongozi wetu wa Kanisa wayahesabu mateso ya sasa kwa ajili yako, kuwa si kitu yakilinganishwa na utukufu utakaofunuliwa kwa uvumilivu na majitoleo yao. Ee Bwana.

2. Ili wote wenye madaraka katika jamii zetu wajaliwe kutimiza vema wajibu zao, kwa kuwahudumia walengwa kwa wakati unaokubalika. Ee Bwana.

3. Ili tujaliwe kungojea kwa saburi matunda ya sala na kazi tunazozifanya kwa jina lako. Ee Bwana.

4. Ili upendo wa kila mtu kwa mwili wake uwe kipimo cha kuwapenda wenzetu na Kanisa lako. Ee Bwana.

5. Ili ndugu zetu marehemu waliokutumaini wapate kuuona uso wako mtukufu huko mbinguni. Ee Bwana.

Ee Mungu, malaika wako waipokee sala yetu na kuileta mbele yako. Kwa njia ya Kristo Bwana wetu. Amina.