SOMO: Efe.2:1-10
Mlikuwa wafu kwa sababu ya makosa na dhambi zenu; ambazo mliziendea zamani kwa kuifuata kawaida ya ulimwengu huu, na kwa kumfuata mfalme wa uwezo wa anga, roho yule atendaye zake sasa katika wana wa kuasi; ambao zamani, sisi sote nasi tulienenda kati yao, katika tamaa za miili yetu, tulipoyatimiza mapenzi ya mwili na ya nia, tukawa kwa tabia yenu watoto wa hasira kama na hao wengine. Lakini Mungu, kwa kuwa ni mwingi wa rehema, kwa mapenzi yake makuu aliyotupenda; hata wakati ule tulipokuwa wafu kwa sababu ya makosa yetu; alituhuisha pamoja na Kristo; yaani mmeokolewa kwa neema. Akatufufua pamoja naye, akatuketisha pamoja naye katika ulimwengu wa roho, katika Kristo Yesu. Ili katika zamani zinazokuja audhihirishe wingi wa neema yake upitao kiasi kwa wema wake kwetu sisi katika Kristo Yesu. Kwa maana mmeokolewa kwa neema, kwa njia ya Imani; ambayo hiyo haikutokana na nafsi zenu, ni kipawa cha Mungu; wala si kwa matendo, mtu awaye yote asije akajisifu. Maana tu kazi yake, tuliumbwa katika Kristo Yesu, tutende matendo mema, ambayo tokea awali Mungu aliyatengeneza ili tuenende nayo.

WIMBO WA KATIKATI: Zab.100(K)3
1. Mfanyieni Bwana shangwe, dunia yote;
Mtumikieni Bwana kwa furaha;
Njoni mbele zake kwa kuimba.

(K) Ndiye aliyetuumba, na sisi tu watu wake.

2. Jueni kwamba Bwana ndiye Mungu;
Ndiye aliyetuumba na sisi tu watu wake;
Tu watu wake, na kondoo wa malisho yake. (K)

3. Ingieni malangoni mwake kwa kushukuru;
Nyuani mwake kwa kusifu;
Mshukuruni, lihimidini jina lake. (K)

4. Kwa kuwa Bwana ndiye mwema;
Rehema zake ni za milele;
Na uaminifu wake vizazi na vizazi. (K)

SHANGILIO: Yn.8:12
Aleluya, aleluya!
Mimi ndimi nuru ya ulimwengu, asema Bwana, yeye anifuataye hatakwenda gizani kamwe, bali atakuwa na nuru ya uzima.
Aleluya!

INJILI: Lk.12;13-21
Mtu mmoja katika mkutano alimwambia Yesu, Mwalimu, mwambie ndugu yangu anigawie urithi wetu. Akamwambia, Mtu wewe, ni nani aliyeniweka mimi kuwa mwamuzi au mgawanyi juu yenu? Akawaambia, Angalieni, jilindeni na choyo, maana uzima wa mtu haumo katika wingi wa vitu vyake alivyo navyo. Akawaambia mithali, akisema, Shamba la mtu mmoja tajiri lilikuwa limezaa sana; akaanza kuwaza moyoni mwake, akisema, Nifanyeje? Maana sina pa kuyaweka akiba mavuno yangu. Akasema, Nitafanya hivi; nitazivunja ghala zangu, nijenge nyingine kubwa zaidi, na humo nitaweka nafaka yangu yote na vitu vyangu. Kisha, nitajiambia, Ee nafsi yangu, una vitu vyema vingi ulivyojiwekea akiba kwa miaka mingi; pumzika basi, ule, unywe, ufurahi. Lakini Mungu akamwambia, Mpumbavu wewe, usiku huu wa leo wanataka roho yako! Na vitu ulivyojiwekea tayari vitakuwa vya nani? Ndivyo alivyo mtu ajiwekeaye nafsi yake akiba, asijitajirishe kwa Mungu.

--------------
Maombi mengine
--------------
MAOMBI
Kwa vile pendo la Mungu limekwisha kumiminwa mioyoni mwetu na Roho Mtakatifu, tumehesabiwa haki pasipo mastahili. Tumsifu na kumtukuza Mungu tukisema:-

Kiitikio: Utukuzwe, Ee Mungu.
1. Kwa kuwa umelijalia Kanisa lako Maaskofu na apadre ambao wamehesabiwa haki ya kuushiriki ukuhani wa Mwanao Yesu Kristo.

2. Kwa kuwa hata viongozi wa serikali ni kazi yako, wameumbwa ili watende matendo mema, ambayo tokea mwanzo uliyatengeneza ili tuende nayo.

3. Kwa kuwa watu wote duniani wamehesabiwa haki ya kuwa wazao wa Ibrahimu aliye baba yetu wa Imani.

4. Kwa kuwa sisi tunaokuamini tulipata kuhesabiwa haki kwa Fumbo Kuu la Pasaka, lilitotimizwa na Mwanao Mpenzi Yesu Kristo.

5. Kwa kuwa hata ndugu zetu marehemu wamehesabiwa haki, wanaombewa na sisi tulio bado hai hapa duniani, ili wapewe uzima wa milele huko mbinguni.

Ee Mungu unayetaka tujitajirishe kwako, uyapokee maombi yetu. Kwa njia ya Kristo Bwana wetu. Amina.