SOMO: Flp.2:1.4
Ikiwako faraja yoyote katika Kristo, yakiwako matulizo yoyote ya mapenzi, ukiwako ushirika wowote wa Roho, ikiwako huruma yoyote na rehema, ijalizeni furaha yangu, ili mwe na nia moja, wenye mapenzi mamoja, wenye roho moja, mkinia mamoja. Msitende neno lolote kwa kushindana wala kwa majivuno; bali kwa unyenyekevu, kila mtu na amhesabu mwenziwe kuwa bora kuliko nafsi yake. Kila mtu asiangalie mambo yake mwenyewe, bali kila mtu aangalie mambo ya wengine.

WIMBO WA KATIKATI: Zab.131
1. Bwana, moyo wangu hauna kiburi,
Wala macho yangu hayainuki.
Wala sijushughulishi na mambo makuu,
Wala na mambo yashindayo nguvu zangu.

(K) Moyo wangu uwe na amani kwako, Ee Bwana.

2. Hakika nimeituliza nafsi yangu,
Na kuinyamazisha.
Kama mtoto aliyeachishwa
Kifuani mwa mama yake;
Ndivyo roho yangu ilivyo kwangu. (K)

3. Ee Israeli, umtarajie Bwana,
Tangu leo na hata milele. (K)

SHANGILIO: Zab.130:5
Aleluya, aleluya!
Roho yangu inamngoja Bwana, na neno lake nimelitumainia.
Aleluya!

INJILI: Lk.14:12-14
Yesu alimwambia yule aliyemwalika, Ufanyapo chakula cha mchana au cha jioni, usiwaite rafiki zako, wala ndugu zako, wala jamaa zako, wala jirani zako wenye mali; wao wasije wakakualika wewe ukapata malipo. Bali ufanyapo karamu waite maskini, vilema, viwete, vipofu, nawe utakuwa heri, kwa kuwa hao hawana cha kukulipa; kwa maana utalipwa katika ufufuo wa wenye haki.

--------------
Maombi mengine
--------------
MAOMBI
Ndugu, Mungu aliye mkarimu na mwenye huruma daima yupo tayari kusikiliza sala zetu. Na hivi tumwombe.

Kiitikio: Twakuomba utusikie.
1. Viongozi wa Kanisa wajaliwe kuwahubiria waamini wao neno lako kadiri ya alama za nyakati, na kubainisha imani halisi ya watu wako. Ee Bwana.

2. Viongozi wa serikali na taasisi zake wawahudumie watu kwa unyenyekevu; wakiwaangalia kwanza wenye shida. Ee Bwana.

3. Kwa kuishi na kufanya kazi pamoja na waamini wenye imani safi, wote waliokuasi Wewe Mungu wajaliwe wongofu na maisha ya fadhila. Ee Bwana.

4. Sisi sote tujaliwe moyo wa huruma na ukarimu kwa wenye shida, ili nao waonje uwepo wako na rehema yako. Ee Bwana.

5. Uwarehemu ndugu zetu marehemu na kuwashirikisha utukufu wa ufufuko wa wenye haki huko mbinguni. Ee Bwana.

Ee Mungu uliyetuahidia malipo ya ukarimu katika ufufuko wa wenye haki, uyapokee maombi yetu. Kwa njia ya Kristo Bwana wetu. Amina.