SOMO 1: Isa.7:10–14
Siku zile, Bwana alisema na Ahazi akinena, Jitakie ishara ya Bwana, Mungu wako; itake katika mahali palipo chini sana, au katika mahali palipo juu sana. Lakini Ahazi akasema, Sitaitaka, wala sitamjaribu Bwana. Naye akasema, Sikilizeni sasa, enyi nyumba ya Daudi; Je! Ni neno dogo kwenu kuwachosha wanadamu, hata mkataka kumchosha Mungu wangu pia? Kwa hiyo Bwana mwenyewe atawapa ishara. Tazama, bikira atachukua mimba, atazaa mtoto mwanamume, naye atamwita jina lake Imanueli.

WIMBO WA KATIKATI: Zab.24:1–6
1. Nchi na vyote viijazavyo ni mali ya Bwana,
Dunia na wote wakaao ndani yake.
Maana ameiweka misingi yake juu ya bahari,
Na juu ya mito ya maji aliithibitisha. (K)

(K) Mfalme wa utukufu apate kuingia.

2. Ni nani atakayepanda katika mlima wa Bwana?
Ni nani atakayesimama katika patakatifu pake?
Mtu aliye na mikono safi na moyo mweupe.
Asiyeiinua nafsi yake kwa ubatili. (K)

3. Atapokea Baraka kwa Bwana,
Na haki kwa Mungu wa wokovu wake.
Hiki ndicho kizazi cha wamtafutao,
Wakutafutao uso wako, Ee Mungu wa Yakobo. (K)

Shangilio
Aleluya, aleluya,
Ee ufunguo wa Daudi, ufunguaye milango ya ufalme wa milele, njoo kuwaokoa watu wako waliofungwa katika gereza la giza.
Aleluya.

INJILI: Lk.1:26–38
Malaika Gabrieli alitumwa na Mungu kwenda mpka mji wa Galilaya, jina lake Nazareti, kwa mwanamwali bikira aliyekuwa ameposwa na mtu, jina lake Yusufu, wa mbari ya Daudi; na jina lake bikira huyo ni Mariamu. Akaingia nyumbani kwake akasema, Salamu, uliyepewa neema. Bwana yu pamoja nawe. Naye akafadhaika sana kwa ajili ya maneno yake, akawaza moyoni, Salamu hii ni ya namna gani? Malaika akamwambia, Usiogope, Mariamu, kwa maana umepata neema kwa Mungu. Tazama, utachukua mimba na kuzaa mtoto mwanamume; na jina lake utamwita Yesu. Huyo atakuwa mkuu, ataitwa Mwana wa Aliye juu, na Bwana Mungu atampa kiti cha enzi cha Daudi, baba yake. Ataimiliki nyumba ya Yakobo hata milele, na ufalme wake utakuwa hauna mwisho. Mariamu akamwambia malaika, Litakuwaje neno hili, maana sijui mume? Malaika akajibu akamwambia, Roho Mtakatifu atakujilia juu yako, na nguvu zake Aliye juu zitakufunika kama kivuli; kwa sababu hiyo hicho kitakachozaliwa kitaitwa kitakatifu, Mwana wa Mungu. Tena, tazama, jamaa yako Elisabeti naye amechukua mimba ya mtoto mwanamume katika uzee wake; na mwezi huu ni wa sita kwake yeye aliyeitwa tasa; kwa kuwa hakuna neno lisilowezekana kwa Mungu. Mariamu akasema, Tazama, mimi ni mjakazi wa Bwana; na iwe kwangu kama ulivyosema. Kisha malaika akaondoka akaenda zake.

------------

NOVENA YA NOELI
Kama inasaliwa hufuata mara baada ya Injili, na huchukua sehemu ya sala za waamini

• Novena

  NOVENA Des. 20 P:- Furahi ee Binti Sioni, na shangilia ee Binti Yerusalemu: sikia Bwana atafika na siku ile utatokea mwanga mkuu, na milima itatonesha utamu; na vilima vitatiririsha maziwa na asali, kwa sababu atafika nabii mkuu, na yeye atageuza Yerusalemu W: Bwana yu karibu, njoni tumwabudu. K: - Sasa Mungu-Mtu wa nyumba ya Daudi atakuja kuketi juu ya kiti cha enzi; mtamwona na moyo wenu utafurahi. W: Bwana yu karibu, njoni tumwabudu. K:- Sikia, atafika Bwana na Mlinzi wetu, Mtakatifu wa Israeli. Kichwani mwake ana taji la ufamle wake: atatawala nchi toka bahari hata bahari, toka mto hata ukingoni mwa dunia. W: Bwana yu karibu, njoni tumwabudu. K:- Sikia Bwana atakuja, hadanganyi; hata akikawia mngoje kwani atafika tu, hawezi kuchelewa. W: Bwana yu karibu, njoni tumwabudu. K:- Bwana atashuka kama mvua juu ya ngozi yenye manyoya: katika siku zake kutakuwa na haki na amani tele; na wafalme wote wa dunia watamwabudu na makabila yote yatamtumikia. W: Bwana yu karibu, njoni tumwabudu. K:- Mtoto atazaliwa kwa ajili yetu na ataitwa Mungu mwenye nguvu; atakalia kiti cha enzi cha Daudi baba yake; atatawala na begani atachukua fimbo ya uwezo wake. W: Bwana yu karibu, njoni tumwabudu. K:- Ee Bethlehemu Mji wa Mungu Mkuu, kwako atatokea mtawala wa Israeli: na uzao wake ni wa milele, atatukuzwa katika dunia yote; na atakapofika, kutakuwa amani humu duniani mwetu. W: Bwana yu karibu, njoni tumwabudu. P: Ee Bwana twakusihi uharakishe wala usichelewe na utuletee nguvu ya juu, kusudi wote wanaotumainia huruma yako wapate kufarijiwa na majilio yako. Unayeishi na kutawala daima na milele. Amina. -------------------------- Baada ya kukominika [badala ya wimbo wa Shukurani], huimbwa Antifona na kisha wimbo wa Bikira Maria [Maginificat] ANT: Ee ufuguo wa Daudi na fimbo ya kifalme ya nyumba ya Israeli, ambaye wafungua wala asipatikane wa kufunga; wafunga wala asipatikane wa kufungua, uje umtoe gerezani mfungwa anayeketi gizani na kivulini mwa mauti. WIMBO WA BIKIRA MARIA Lk.1:46-55 Roho yangu inamfurahia Bwana Moyo wangu wamtukuza Bwana,/ Roho yangu inafurahi* kwa sababu ya Mungu Mwokozi wangu. Kwa kuwa amemwangalia kwa huruma/ mtumishi wake mdogo,* hivyo tangu sasa watu wote wataniita mwenye heri. Kwa kuwa Mwenyezi Mungu amenitendea makuu,* jina lake ni takatifu. Huruma yake kwa watu wanaomcha* hudumu kizazi hata kizazi. Amefanya mambo makuu kwa mkono wake:* amewatawanya wenye kiburi katika mawazo ya mioyo yao; amewashusha wenye vyeo kutoka viti vyao vya enzi,* akawakweza wanyeyekevu. Wenye njaa amewashibisha mema,* matajiri amewaacha waende mikono mitupu. Amempokea Israeli mtumishi wake,* akikumbuka huruma yake, kama alivyowaahidia wazee wetu,* Abrahamu na uzao wake hata milele. Atukuzwe Baba na Mwana* na Roho Mtakatifu. Kama mwanzo na sasa na siku zote* na milele. Amina ANT: Ee ufuguo wa Daudi na fimbo ya kifalme ya nyumba ya Israeli, ambaye wafungua wala asipatikane wa kufunga; wafunga wala asipatikane wa kufungua, uje umtoe gerezani mfungwa anayeketi gizani na kivulini mwa mauti. -------------- Baada ya wimbo wa Bikira Maria, na antifona yake kisha isaliwe sala baada ya Komunyo na kisha Baraka.

--------------
Maombi mengine
--------------
MAOMBI
Ee Bwana Mungu, wewe umependa kutukomboa sisi wanadamu kwa njia ya mwanadamu; tena umekuwa mwaminifu katika kutimiza ahadi zako. Tunapongojea kwa matumaini kuzaliwa kwa Mkombozi uliyetuahidia, twakuomba:

Kiitikio: Twakuomba utusikie.
1. Utujalie imani thabiti yenye kujali ishara za nyakati kwa ajili ya wokovu wetu.

2. Majina yetu ya Kikristo tuliyopewa yatukumbushe kwamba tumeahidi kukupokea na kuwa wafuasi wa Mwanao siku zote.

3. Kwa umwilisho wa Mwanao, daima tuonje huruma na upendo wako kwetu sisi wakosefu; na tumpokee daima katika Ekaristi Takatifu ili siku zote awe Mungu pamoja nasi.

4. Kwa maombezi ya Mama Bikira Maria, tujaliwe upendo wa kweli, utii wa imani na utayari wa kushiriki kazi ya ukombozi bila masharti yoyote.

Tunaomba hayo kwa njia ya Kristo Bwana wetu. Amina.