SOMO 1: Mal.3:1-4;4:5-6
Bwana Mungu asema: angalieni, namtuma mjumbe wangu, naye ataitengeneza njia mbele yangu; naye Bwana mnayemtafuta atalijilia hekalu lake ghafula; naam, yule mjumbe wa agano mnayemfurahia, angalieni, anakuja, asema Bwana wa majeshi. Lakini ni nani atakayestahimili siku ya kuja kwake? Au ni nani atakayesimama atakapoonekana yeye? Kwa maana yeye ni mfano wa moto wa mtu asafishaye fedha, ni mfano wa sabuni ya mtu afuaye nguo; naye ataketi kama asafishaye fedha na kuitakasa, naye atawatakasa wana wa Lawi, atawasafisha kama dhahabu na fedha; nao watamtolea Bwana dhabihu katika haki. Wakati ule ndipo dhabihu za Yuda na Yerusalemu zitakapopendeza mbele za Bwana, kama katika siku za kale, na kama katika miaka ya zamani. Angalieni, nitawapelekea Eliya nabii, kabla haijaja siku ile ya Bwana, iliyo kuu na kuogofya. Naye ataigeuza mioyo ya baba iwaelekee watoto wao, na mioyo ya watoto iwaelekee baba zao, ili nisije nikaipiga dunia kwa laana.

WIMBO WA KATIKATI: Zab.25:4-5,8-10,14
1. Ee Bwana, unijulishe njia zako,
Unifundishe mapito yako,
Uniongoze katika kweli yako,
Na kunifundisha. (K)

(K) Changamkeni, mkaviinue vichwa vyenu, kwa kuwa ukombozi wenu unakaribia.

2. Bwana yu mwema, mwenye adili,
Kwa hiyo atawafundisha wenye dhambi njia.
Wenye upole atawaongoza katika hukumu,
Wenye upole atawafundisha njia yake. (K)

3. Njia zote za Bwana ni fadhili na kweli,
Kwao walishikao agano lake na shuhuda zake.
Siri ya Bwana iko kwao wamchao,
Naye atawajulisha agano lake. (K)

Shangilio
Aleluya, aleluya,
Ee Immanuel, mfalme na mwanasheria wetu, njoo ukatuokoe, ee Bwana, Mungu wetu.
Aleluya.

INJILI: Lk.1:57-66
Ikawa, siku za kuzaa kwake Elisabeti zilipotimia, alizaa mtoto mwanamume. Wakasikia jirani zake na jamaa zake ya kwamba Bwana amemwongezea rehema zake, wakafurahi pamoja naye. Ikawa siku ya nane wakaja kumtahiri mtoto; wakataka kumpa jina la babaye, Zakaria. Mamaye akajibu akasema La, sivyo; bali, ataitwa Yohana. Wakamwambia, Hapana mtu katika jamaa zako aitwaye jina hilo. Wakamwashiria babaye wajue atakavyo kumwita. Akataka kibao, akaandika ya kwamba, Jina lake ni Yohana. Wakastaajabu wote. Papo hapo kinywa chake kikafunguliwa na ulimi wake pia, akaanza kunena akimsifu Mungu. Wakaingiwa na hofu wote waliokuwa wakikaa karibu nao; na mambo hayo yote yakatangazwa katika nchi yote ya milima milima ya Uyahudi. Na wote walioyasikia wakayaweka mioyoni mwao, wakisema, Mtoto huyu atakuwa wa namna gani? Kwa sababu mkono wa Bwana ulikuwa pamoja naye.

------------

NOVENA YA NOELI
Kama inasaliwa hufuata mara baada ya Injili, na huchukua sehemu ya sala za waamini

• Novena

  NOVENA Des. 23 P:- Furahi ee Binti Sioni, na shangilia ee Binti Yerusalemu: sikia Bwana atafika na siku ile utatokea mwanga mkuu, na milima itatonesha utamu; na vilima vitatiririsha maziwa na asali, kwa sababu atafika nabii mkuu, na yeye atageuza Yerusalemu W: Bwana yu karibu, njoni tumwabudu. K: - Sasa Mungu-Mtu wa nyumba ya Daudi atakuja kuketi juu ya kiti cha enzi; mtamwona na moyo wenu utafurahi. W: Bwana yu karibu, njoni tumwabudu. K:- Sikia, atafika Bwana na Mlinzi wetu, Mtakatifu wa Israeli. Kichwani mwake ana taji la ufamle wake: atatawala nchi toka bahari hata bahari, toka mto hata ukingoni mwa dunia. W: Bwana yu karibu, njoni tumwabudu. K:- Sikia Bwana atakuja, hadanganyi; hata akikawia mngoje kwani atafika tu, hawezi kuchelewa. W: Bwana yu karibu, njoni tumwabudu. K:- Bwana atashuka kama mvua juu ya ngozi yenye manyoya: katika siku zake kutakuwa na haki na amani tele; na wafalme wote wa dunia watamwabudu na makabila yote yatamtumikia. W: Bwana yu karibu, njoni tumwabudu. K:- Mtoto atazaliwa kwa ajili yetu na ataitwa Mungu mwenye nguvu; atakalia kiti cha enzi cha Daudi baba yake; atatawala na begani atachukua fimbo ya uwezo wake. W: Bwana yu karibu, njoni tumwabudu. K:- Ee Bethlehemu Mji wa Mungu Mkuu, kwako atatokea mtawala wa Israeli: na uzao wake ni wa milele, atatukuzwa katika dunia yote; na atakapofika, kutakuwa amani humu duniani mwetu. W: Bwana yu karibu, njoni tumwabudu. P: Ee Bwana twakusihi uharakishe wala usichelewe na utuletee nguvu ya juu, kusudi wote wanaotumainia huruma yako wapate kufarijiwa na majilio yako. Unayeishi na kutawala daima na milele. Amina. -------------------------- Baada ya kukominika [badala ya wimbo wa Shukurani], huimbwa Antifona na kisha wimbo wa Bikira Maria [Maginificat] ANT: Ee Emannuel, Mfalme na mtawala wetu, mngojewa na mataifa na Mkombozi wao; uje utukomboe ee Bwana Mungu wetu. WIMBO WA BIKIRA MARIA Lk.1:46-55 Roho yangu inamfurahia Bwana Moyo wangu wamtukuza Bwana,/ Roho yangu inafurahi* kwa sababu ya Mungu Mwokozi wangu. Kwa kuwa amemwangalia kwa huruma/ mtumishi wake mdogo,* hivyo tangu sasa watu wote wataniita mwenye heri. Kwa kuwa Mwenyezi Mungu amenitendea makuu,* jina lake ni takatifu. Huruma yake kwa watu wanaomcha* hudumu kizazi hata kizazi. Amefanya mambo makuu kwa mkono wake:* amewatawanya wenye kiburi katika mawazo ya mioyo yao; amewashusha wenye vyeo kutoka viti vyao vya enzi,* akawakweza wanyeyekevu. Wenye njaa amewashibisha mema,* matajiri amewaacha waende mikono mitupu. Amempokea Israeli mtumishi wake,* akikumbuka huruma yake, kama alivyowaahidia wazee wetu,* Abrahamu na uzao wake hata milele. Atukuzwe Baba na Mwana* na Roho Mtakatifu. Kama mwanzo na sasa na siku zote* na milele. Amina ANT: Ee Emannuel, Mfalme na mtawala wetu, mngojewa na mataifa na Mkombozi wao; uje utukomboe ee Bwana Mungu wetu. -------------- Baada ya wimbo wa Bikira Maria, na antifona yake kisha isaliwe sala baada ya Komunyo na kisha Baraka.

--------------
Maombi mengine
--------------
MAOMBI
Ndugu, leo tunaambiwa Bwana ambaye ni Mjumbe wa Agano atalijia hekalu lake kwa ghafla; na tunaulizwa: “Lakini ni nani atakayestahimili siku ya kuja kwake, na atakayesimama atakapoonekana yeye?” Tuombe ili tusifadhaishwe na jambo lolote.

Kiitikio: Mungu wa huruma utusikie.
1. Kwa huruma yako ya kimungu, ututakase mioyo na roho zetu, ili tung'ae kuliko fedha na dhahabu kwa ajili ya ujio wa Yesu Masiha wetu.

2. Wahubiri wa Neno lako wafurahie kumtambulisha kwa taifa lako Mkombozi atakayekuja, ambaye wanamhubiri siku zote.

3. Mkombozi wetu aje aiokoe dunia yetu na laana, kwa kuigeuza mioyo ya baba iwaelekee watoto wao, na mioyo ya watoto iwaelekee baba zao.

4. Utujalie sisi sote furaha ya Noeli pamoja na wote watakaozaliwa na Mtoto Yesu siku hiyo kimwili na kiroho.

Ee Mwenyezi, Bwana wetu, kuzaliwa kwa Yohane Mbatizaji, mtangulizi wa Mwanao, kulileta furaha na matumaini makubwa kwa majirani zake Elizabeti. Utupe nasi mwamko wa kufurahia ujio wa Mkombozi wetu na kuwapokea kwa shukrani watoto watakaozaliwa pamoja naye. Anayeishi na kutawala, daima na milele. Amina.