----------------------------------------
Kipindi cha Noel
Misa ya Kesha Misa hii inasaliwa tarehe 24 Desemba, wakati wa jioni, au kabla au baada ya Vesperi ya Kwanza ya Noeli.
Misa ya Usiku
----------------------------------------

SOMO 1: 2Sam.7:1-5,8-11,16
Ikawa, mfalme Daudi alipokuwa akikaa katika nyumba yake, hapo Bwana alipomstarehesha, asiudhiwe na adui zake waliomzunguka pande zote, mfalme akamwambia Nathani, nabii, Angalia sasa, mimi ninakaa katika nyumba ya mierezi, bali sanduku la Mungu linakaa ndani ya mapazia. Nathani akamwambia mfalme, Haya, fanya yote yaliyomo moyoni mwako; maana Bwana yu pamoja nawe. Ikawa usiku uo huo, neno la Bwana likamfikia Nathani kusema, Enenda, ukamwambie mtumishi wangu, Daudi, Bwana asema hivi, Je! Wewe utanijengea nyumba, nikae ndani yake? Basi, sasa, mwambie mtumishi wangu, Daudi, maneno haya, Bwana wa majeshi asema hivi, Nalikutwaa katika zizi la kondoo, katika kuwaandama kondoo, ili uwe mkuu juu ya watu wangu, juu ya Israeli; nami nimekuwa pamoja nawe kila ulikokwenda, na kuwakatilia mbali adui zako wote mbele yako; nami nitakufanyia jina kuu, kama jina la wakuu walioko duniani. Tena nitawaagizia mahali watu wangu Israeli, nami nitawapanda, wapate kukaa mahali pao wenyewe, wasiondolewe tena; wala wana wa uovu hawatawatesa tena, kama hapo kwanza; naam, kama vilivyokuwa tangu siku ile nilipowaamuru waamuzi, wawe juu ya watu wangu Israeli; nami nitakustarehesha mbele ya adui zako wote. Tena Bwana anakuambia ya kwamba Bwana atakujengea nyumba. Na nyumba yako, na ufalme wako, vitathibitishwa milele mbele yako. Nacho kiti chako kitafanywa imara milele.

WIMBO WA KATIKATI: Zab.89:1-4,27,29
1. Fadhili za Bwana nitaziimba milele;
Kwa kinywa changu nitavijulisha vizazi vyote uaminifu wako.
Maana nimesema, Fadhili zitajengwa milele;
Katika mbingu utauthibitisha uaminifu wako. (K)

(K) Fadhili za Bwana nitaziimba milele.

2. Nimefanya agano na mteule wangu,
Nimemuapia Daudi, mtumishi wangu.
Wazao wako nitawafanya imara milele,
Nitakijenga kiti chako cha enzi hata milele. (K)

3. Nami nitamjalia kuwa mzaliwa wangu wa kwanza,
Kuwa juu sana kuliko wafalme wa dunia.
Wazao wake nao nitawadumisha milele,
Na kiti chake cha enzi kama siku za mbingu. (K)

Shangilio
Aleluya, aleluya,
Ee utokaye Mashariki uliye mng'ao wa mwanga wa milele na jua la haki, njoo uwaangazia wakao gizani na katika kivuli cha mauti.
Aleluya.

INJILI: Lk.1:67-79
Siku zile, Zakaria, baba yake mtoto, akajazwa Roho Mtakatifu, akatabiri, akisema, Atukuzwe Bwana, Mungu wa Israeli, Kwa kuwa amewajia watu wake, na kuwakomboa. Ametusimamishia pembe ya wokovu Katika mlango wa Daudi, mtumishi wake. Kama alivyosema tangu mwanzo Kwa kinywa cha manabii wake watakatifu; Tuokolewe na adui zetu Na mikononi mwao wote wanaotuchukia; Ili kuwatendea rehema baba zetu, Na kulikumbuka agano lake takatifu; Uapo aliomwapia Ibrahimu, baba yetu, Ya kwamba atatujalia sisi, Tuokoke mikononi mwa adui zetu, Na kumwabudu pasipo hofu, Kwa utakatifu na kwa haki Mbele zake siku zetu zote. Nawe, mtoto, utaitwa nabii wake Aliye juu, Kwa maana utatangulia mbele za uso wa Bwana umtengenezee njia zake; Uwajulishe watu wake wokovu, Katika kusamehewa dhambi zao. Kwa njia ya rehema za Mungu wetu, Ambazo kwa hizo mwangaza utokao juu umetufikia, Kuwaangaza wakaao katika giza na uvuli wa mauti, Na kuiongoza miguu yetu kwenye njia ya amani.

------------

NOVENA YA NOELI
Kama inasaliwa hufuata mara baada ya Injili, na huchukua sehemu ya sala za waamini

• Novena

  NOVENA Des. 24 P:- Furahi ee Binti Sioni, na shangilia ee Binti Yerusalemu: sikia Bwana atafika na siku ile utatokea mwanga mkuu, na milima itatonesha utamu; na vilima vitatiririsha maziwa na asali, kwa sababu atafika nabii mkuu, na yeye atageuza Yerusalemu W: Bwana yu karibu, njoni tumwabudu. K: - Sasa Mungu-Mtu wa nyumba ya Daudi atakuja kuketi juu ya kiti cha enzi; mtamwona na moyo wenu utafurahi. W: Bwana yu karibu, njoni tumwabudu. K:- Sikia, atafika Bwana na Mlinzi wetu, Mtakatifu wa Israeli. Kichwani mwake ana taji la ufamle wake: atatawala nchi toka bahari hata bahari, toka mto hata ukingoni mwa dunia. W: Bwana yu karibu, njoni tumwabudu. K:- Sikia Bwana atakuja, hadanganyi; hata akikawia mngoje kwani atafika tu, hawezi kuchelewa. W: Bwana yu karibu, njoni tumwabudu. K:- Bwana atashuka kama mvua juu ya ngozi yenye manyoya: katika siku zake kutakuwa na haki na amani tele; na wafalme wote wa dunia watamwabudu na makabila yote yatamtumikia. W: Bwana yu karibu, njoni tumwabudu. K:- Mtoto atazaliwa kwa ajili yetu na ataitwa Mungu mwenye nguvu; atakalia kiti cha enzi cha Daudi baba yake; atatawala na begani atachukua fimbo ya uwezo wake. W: Bwana yu karibu, njoni tumwabudu. K:- Ee Bethlehemu Mji wa Mungu Mkuu, kwako atatokea mtawala wa Israeli: na uzao wake ni wa milele, atatukuzwa katika dunia yote; na atakapofika, kutakuwa amani humu duniani mwetu. W: Bwana yu karibu, njoni tumwabudu. P: Ee Bwana twakusihi uharakishe wala usichelewe na utuletee nguvu ya juu, kusudi wote wanaotumainia huruma yako wapate kufarijiwa na majilio yako. Unayeishi na kutawala daima na milele. Amina. -------------------------- Baada ya kukominika [badala ya wimbo wa Shukurani], huimbwa Antifona na kisha wimbo wa Bikira Maria [Maginificat] ANT: Litakapochomoza jua mbinguni, mtamwona mfalme wa wafalme akitoka kwa baba sawa kama vile Bwana harusi akitoka nyumbani mwake. WIMBO WA BIKIRA MARIA Lk.1:46-55 Roho yangu inamfurahia Bwana Moyo wangu wamtukuza Bwana,/ Roho yangu inafurahi* kwa sababu ya Mungu Mwokozi wangu. Kwa kuwa amemwangalia kwa huruma/ mtumishi wake mdogo,* hivyo tangu sasa watu wote wataniita mwenye heri. Kwa kuwa Mwenyezi Mungu amenitendea makuu,* jina lake ni takatifu. Huruma yake kwa watu wanaomcha* hudumu kizazi hata kizazi. Amefanya mambo makuu kwa mkono wake:* amewatawanya wenye kiburi katika mawazo ya mioyo yao; amewashusha wenye vyeo kutoka viti vyao vya enzi,* akawakweza wanyeyekevu. Wenye njaa amewashibisha mema,* matajiri amewaacha waende mikono mitupu. Amempokea Israeli mtumishi wake,* akikumbuka huruma yake, kama alivyowaahidia wazee wetu,* Abrahamu na uzao wake hata milele. Atukuzwe Baba na Mwana* na Roho Mtakatifu. Kama mwanzo na sasa na siku zote* na milele. Amina ANT: Litakapochomoza jua mbinguni, mtamwona mfalme wa wafalme akitoka kwa baba sawa kama vile Bwana harusi akitoka nyumbani mwake. -------------- Baada ya wimbo wa Bikira Maria, na antifona yake kisha isaliwe sala baada ya Komunyo na kisha Baraka.

--------------
Maombi mengine
--------------
MAOMBI
Ndugu zangu, kwa kuwa Mkombozi wetu anakaribia zaidi sasa kuliko wakati ule tulipoanza kuamini, tunahitaji sana msaada wa Mungu ili maandalizi tunayoyafanya yapate baraka na ulinzi wake:

Kiitikio: Twakuomba utusikie.
1. Uilinde mioyo yetu iliyotakaswa tayari, ili isichafuke tena, na uwaamshe ambao bado hawajajipatanisha nawe, ili wayatumie vema masaa haya machache yaliyosalia.

2. Ujio wa Mwanao utuimarishe tusimame imara katika imani yetu ya kikristo mbele ya adui zetu na wote wanaotuchukia, ili nao wakuongokee wewe.

3. Uifanikishe sherehe inayokuja, ili tumwabudu Mkombozi wetu pasipo hofu, kwa utakatifu na kwa haki.

4. Uwaangaze wakaao katika giza na uvuli wa mauti na kuiongoza miguu yetu katika njia ya amani.

Ee Baba mwema, tunatambua kwamba mtoto atakayezaliwa ndiye Nabii atokaye juu na Mwenye kutuletea wokovu. Utujalie sisi sote tuwe makao yake yasiyo na hila yoyote, ili naye akae kwetu siku zote. Anayeishi na kutawala, daima na milele. Amina.