12

1 Roho yako isiyokufa imo katika vitu vyote.
2 Kwa hiyo wawakosoa kwa taratibu wale wanaokukosea; na kuwakumbusha na kuwaonya juu ya yale wanayokukosea nayo, ili waachane na ubaya wao na kukutumainia wewe, ee Bwana.

Ubaya wa watu wa Kanaani
3 Pia wale wakazi wa awali wa nchi yako takatifu,
4 uliwachukia kwa sababu walifanya mambo ya kuchukiza mno: Walifanya uchawi na ibada chafu;
5 walichinja watoto bila huruma, wakala nyama na damu za watu kama sadaka; walishiriki ibada za siri,
6 na mauaji ya watoto wasioweza kujitetea. Kwa kupenda kwako watu hao waliangamizwa na wazee wetu,
7 kusudi nchi hiyo unayoithamini kuliko zote iwe makao ya watu wanaofaa kuwa watumishi wako.
8 Lakini hata hawa uliwaonea huruma maana ni watu tu. Ulipeleka nyuki watangulie jeshi lako ili kuwaangamiza polepole.
9 Ungaliweza kuwaruhusu watu wema wawaangamize waovu vitani; au ungaliweza kuwaangamiza kwa wanyama wakali au kwa neno moja kali.
10 Lakini ulitekeleza hukumu yako polepole kuwapa fursa ya kutubu; ingawa ulijua kwamba kwa asili walikuwa waovu: Walikuwa wakorofi tangu kuzaliwa kwao na kwamba hawangeweza kubadili mawazo yao.
11 Naam, wao walikuwa wamelaaniwa tangu awali, wala si kwa kumwogopa mtu yeyote ndipo ukawaacha kuwaadhibu kwa dhambi zao.

Mungu ana uwezo juu ya yote
12 Nani awezaye kukuuliza kisa cha matendo yako, au kupinga uamuzi wako? Nani atakushtaki kwamba umeangamiza mataifa uliyoyaumba? Nani awezaye kuja mbele yako kuwatetea watu hao waovu?
13 Hakuna mungu mwingine ila wewe ambaye huyaangalia maslahi ya wote nawe wapaswa kutambuliwa kwamba umehukumu kwa haki.
14 Wala hakuna mfalme au mtawala yeyote awezaye kukushtaki ukiwa umemwadhibu mtu yeyote.
15 Kwa vile wewe ni mwadilifu na watawala kwa uadilifu kamwe hutumii nguvu yako kumwadhibu asiyestahili adhabu.
16 Uwezo wako ni asili ya uadilifu; wawaonea huruma watu wote kwa maana wewe ni Bwana wa wote.
17 Iwapo binadamu hasadiki kwamba uwezo wako ni mkamilifu, basi, wewe huidhihirisha nguvu yako, na kuwafadhaisha wale wanaojua uwezo wako lakini hawaujali.
18 Ingawa unao uwezo mkuu, hata hivyo wahukumu kwa upole; na watutawala kwa uvumilivu mkubwa maana unao uwezo wa kuadhibu wakati wowote upendao.
19 Kwa matendo yako umewafundisha watu wako kwamba mtu aliye mwadilifu anapaswa kuwa mpole. Umewapa watoto wako matumaini makubwa, maana watu wakikosa unawajalia uwezekano wa kutubu.
20 Wewe ulikuwa mwangalifu na mwenye uvumilivu katika kuwaadhibu maadui za watu wako ingawa walistahili kufa; uliwapa fursa kubwa ya kuachana na uovu wao.
21 Lakini watu wako wewe mwenyewe uliwahukumu vikali, ingawa ulikuwa umewaapia na kuwaahidia wazee wao mambo mema.
22 Basi, watuadhibu sisi, lakini wawaadhibu maadui zetu mara elfu kumi zaidi kusudi wakati tunapohukumu tuukumbuke wema wako na wakati tunapohukumiwa tutazamie kupata huruma.

Adhabu ya Wamisri
23 Basi, wale walioishi vibaya na kipumbavu, uliwatesa kwa vitu vyao vya kuchukiza.
24 Walipotea mbali katika makosa, wakaabudu vinyama ambavyo hata maadui zao walividharau; walidanganyika kama watoto wapumbavu.
25 Hivyo kama watoto wasio na akili, uliwaletea adhabu wakazomewa.
26 Lakini wale wanaodharau kuonywa kwa adhabu kidogo, watauona uzito wa adhabu Mungu atakayowapa.
27 Walipoadhibiwa kwa viumbe vilevile walivyodhani kuwa miungu, walipumbazika wakafahamu kwamba Mungu wa kweli ni yuleyule waliyekuwa wanakataa kumtambua. Kwa hiyo walipata adhabu kali kabisa.